पोखरा, १८ माघ ।
पोखरामा जारी मनकामना केबलकार पोखरा कप फुटबल खेलको तेश्रो प्रि क्वाटरमा आयोजक पोखरा ११ ब्रिगेड ब्याइज क्लब संग १–० गोलले पराजित हुँदै बाहिरिएको छ ।
खेलको ७२ औं मिनेटमा ब्रिगेडका काजिम बुशारीको एक मात्र गोल नै ब्रिगेडका लागि दोश्रो चरणमा प्रवेशका लागि सहयोगी बन्यो । मनोज राईको प्रहार पोखरा ११ का गोल रक्षक अजित पराजुलीको हात बाट फुस्किदा काजिमको पहिलो प्रयास भने डिफेन्सले बचाएका थिए । काजिमले उक्त बल कलेक्ट गर्दै गोल गर्ने प्रयास गरे तर डिफेन्सले पहिलो प्रयासलाई बचाए पनि डिफेन्सकै खुट्टामा लागेर गोललाइन बाट आएको रिवाउण्ड बललाई दोश्रो पटक उनले गोलमा परिणत गरे ।
खेलमा दुबै टिममा फिनिसिङको कमजोरी देखिएपनि २८ औं मिनेटमा पोखरा ११ का बिनोद गुरुङको प्रहार बार नजिक बाट बाहिरिएको थियो भने ६२ औं मिनेटमा विदेशी खेलाडी फोडे फोफामा क्रसलाई शुसिल लामाको हेड मार्फत गोल गर्ने प्रयासलाई ब्रिगेडका किपर लक्की कार्कीले बचाउ गरे ।
खेलमा प्रशिक्षक किरण श्रेष्ठले खेलाडी परिवर्तन गरि आफ्नो पक्षमा पार्ने प्रयास गरे पनि त्यो सम्भब भएन र पोखरा ११ पराजित हुँदै खेल बाट बाहिरिन पुग्यो ।
शनिबारको खेल मनकामना कपको तेश्रो संस्करणको उपाधी बिजेता नेपाल पुलिसले संकटाको सामना गर्ने भएको आयोजक एन्फा कास्कीले जनाएको छ ।
