केशव पाठक/पोखरा स्पोर्ट्स । सपना सधैं ठूलो योजना र ठूलो लगानीबाट जन्मिन्छ भन्ने छैन । कहिलेकाहीँ सपना साथीभाइको सानो जमघट, एउटै सोच र एउटै संकल्पबाट पनि जन्मिन्छ । सात वर्षअघि पोखरामा त्यस्तै एउटा लह–लहैको जमघटबाट जन्मियो—टाइगर ग्रुप अफ पोखरा, नेपाल । त्यो बेला कसैले सोचेको थिएन, यही समूहले भोलि गएर नेपाली भलिबलमा एउटा नयाँ अध्याय लेख्नेछ ।
आज, पाँच संस्करण सफलतापूर्वक पार गरिसकेको टाइगर कप आमन्त्रण राष्ट्रिय तथा अन्तर्राष्ट्रिय क्लब महिला तथा पुरुष भलिबल प्रतियोगिता केवल प्रतियोगिता होइन, नेपाली खेलकुदको एउटा पहिचान बनिसकेको छ । छैटौँ संस्करण सुरु हुन मात्र १२ दिन बाँकी रहँदा टाइगर कपको चर्चा पोखराको सीमाभन्दा बाहिर पुगिसकेको छ । स्वदेशी खेलप्रेमी मात्र होइन, विदेशी क्लब, खेलाडी र प्रशिक्षकहरू पनि टाइगर कपलाई चासोका साथ हेरिरहेका छन् ।
लह–लहैमा जन्मिएको त्यो सानो सपना आज हजारौँ खेलप्रेमीको गर्व बनेको छ । टाइगर कप भलिबलले, खेल मात्र होइन, सोच बदलिरहेको छ । यही सोचको निरन्तरताले टाइगर कप भोलि नेपालकै होइन, दक्षिण एसियाकै नमुना भलिबल प्रतियोगिता बन्ने आशा दिलाएको छ ।
खुला आकाशमुनि खुलेको नयाँ दृष्टिकोण
नेपालको राष्ट्रिय खेल भलिबललाई पोखरा रंगशालाको भलिबल प्रशिक्षण केन्द्रमा, खुला आकाशमुनि सञ्चालन गर्नु टाइगर कपको सबैभन्दा साहसी निर्णय हो । जब विश्वभर भलिबललाई इन्डोर खेलका रूपमा मात्रै हेरिन्छ, टाइगर कपले प्रमाणित गर्यो—भलिबल केवल हलभित्र सीमित छैन ।
खुला मैदान, प्राकृतिक हावा, दर्शकसँग नजिकको अनुभूति—यी सबैले खेललाई अझ जीवन्त बनाइदिएको छ । यही प्रयोगले अन्तर्राष्ट्रिय भलिबल समुदायलाई “खेलको आत्मा कहाँ हुन्छ ?” भन्ने प्रश्न सोध्न बाध्य बनाएको छ ।
खेलाडीका लागि अवसर, युवाका लागि प्रेरणा
टाइगर कपको प्रभाव खेल मैदानमै सीमित छैन । यो प्रतियोगिता नेपाली खेलाडीका लागि अन्तर्राष्ट्रिय अनुभव सँगाल्ने विद्यालय बनेको छ । विदेशी क्लबहरूसँगको प्रतिस्पर्धाले घरेलु खेलाडीलाई खेल कौशल, अनुशासन र व्यावसायिक सोच सिकाएको छ ।
महिला र पुरुष दुवै विधालाई समान महत्त्व दिइनु टाइगर कपको सामाजिक सन्देश हो । महिला खेलाडीका लागि टाइगर कप केवल खेल्ने मञ्च होइन, आफूलाई प्रमाणित गर्ने आत्मविश्वासको आधार बनेको छ । यही कारण धेरै युवा खेलाडी आज “टाइगर कप खेल्ने” सपना देख्न थालेका छन् ।
खेलभन्दा बाहिरको टाइगर कप
टाइगर कप केवल खेल प्रतियोगितामा सीमित छैन । यसले पोखराको सामाजिक जीवनमा गहिरो प्रभाव छोडेको छ । प्रतियोगिताका दिनहरूमा पोखरा खेलमय शहरमा रूपान्तरण हुन्छ । होटल, रेष्टुराँ, यातायात, साना व्यवसाय सबै चलायमान हुन्छन् । यसले स्थानीय अर्थतन्त्रमा प्रत्यक्ष योगदान पुर्याएको छ । खेलले शहरलाई आर्थिक र सांस्कृतिक रूपमा पनि जोड्ने काम गरेको छ ।
सामाजिक सद्भाव, स्वयंसेवक संस्कृति र युवाहरूको सक्रिय सहभागिता टाइगर कपको अर्को पहिचान हो । विभिन्न पृष्ठभूमिका युवाहरू एउटै उद्देश्यका लागि संगठित भएर काम गर्छन् । यसले नेतृत्व विकास, टीमवर्क र जिम्मेवारीको भावना विकास गर्न ठूलो भूमिका खेलेको छ ।
टाइगर कपले “खेल समाज परिवर्तनको माध्यम हो” भन्ने सन्देशलाई व्यवहारमै उतारेको छ । लागूपदार्थ दुर्व्यसन, नकारात्मक प्रवृत्तिबाट युवालाई खेलतर्फ आकर्षित गर्ने अभियानमा टाइगर कप मौन तर प्रभावकारी अभियान बनेको छ । अर्कोतर्फ शिक्षा, स्वास्थ्य र सामाजिक कृयाकलापमा आफ्नो योगदान यो संस्थाको अर्को महत्वपूर्ण पाटोको रुपमा स्थापित भएका कारण अझै चर्चा बटुल्न सफल भएको छ ।
नेतृत्व, निरन्तरता र विश्वास
टाइगर ग्रुपका अध्यक्ष नारायणप्रसाद शर्माको नेतृत्वमा रहेको टिमको समर्पण टाइगर कपको मेरुदण्ड हो । सीमित स्रोत, सीमित सहयोगका बीच पनि निरन्तरता कायम राख्नु आफैंमा ठूलो उपलब्धि हो ।
टाइगर कप आज सरकारी निकाय, खेल संघसंस्था, निजी क्षेत्र र दर्शकबीच विश्वासको पुल बनेको छ । यही विश्वासले टाइगर कपलाई संस्थाबाट ब्राण्डमा रूपान्तरण गरेको हो ।
भोलिको टाइगर कप
आज टाइगर कप भलिबल एउटा प्रतियोगिता मात्र होइन-यो सम्भावनाको कथा बनेको छ । यसले देखाएको छ, यदि सपना स्पष्ट छ, नेतृत्व इमानदार छ र समाजको साथ छ भने नेपाली खेलकुद विश्वसामु उभिन सक्छ । नेतृत्व विकास, समय व्यवस्थापन र सामाजिक उत्तरदायित्व विषयको पाठ यसको अर्को महत्वपूर्ण पक्षलाई सबैलाई गर्वित महशुस गराउँछ ।
लह–लहैमा जन्मिएको त्यो सानो सपना आज हजारौँ खेलप्रेमीको गर्व बनेको छ । टाइगर कप भलिबलले, खेल मात्र होइन, सोच बदलिरहेको छ । यही सोचको निरन्तरताले टाइगर कप भोलि नेपालकै होइन, दक्षिण एसियाकै नमुना भलिबल प्रतियोगिता बन्ने आशा दिलाएको छ ।
