केशव पाठक/पोखरा स्पोर्ट्स । पोखरा केवल प्राकृतिक सौन्दर्यले भरिएको पर्यटकीय सहर मात्र होइन, नेपाली खेलकुदको महत्त्वपूर्ण उत्पादन केन्द्र पनि हो । हिमाल, ताल र पहाडको काखमा हुर्किएको यो सहरले दशकौँदेखि राष्ट्रिय तथा अन्तर्राष्ट्रिय स्तरका खेलाडी जन्माउँदै आएको छ । यिनै खेलाडीको मेहनत, अनुशासन र उपलब्धिलाई सम्मान गर्ने राष्ट्रिय मञ्चका रूपमा स्थापित हुँदै आएको पल्सर स्पोर्ट्स अवार्डको २२औं संस्करण पोखरेली खेलकुदसँग गहिरो सन्दर्भ र विशेष महत्व जोडेर हेर्न सकिन्छ ।
पल्सर स्पोर्ट्स अवार्ड नेपाली खेलकुदकै सबैभन्दा प्रतिष्ठित र निरन्तर आयोजना हुँदै आएको सम्मान समारोह हो । वर्षेनी विभिन्न विधामा उत्कृष्ट प्रदर्शन गर्ने खेलाडी, प्रशिक्षक, उदाउँदा प्रतिभा तथा खेलकुदमा दीर्घ योगदान पुर्याउने व्यक्तित्वलाई यसले सम्मान गर्छ । २२औं संस्करणसम्म आइपुग्दा यो अवार्ड केवल पुरस्कार वितरणको कार्यक्रम मात्र नभई नेपाली खेलकुदको मूल्यांकन गर्ने एक विश्वसनीय मञ्चका रूपमा स्थापित भइसकेको छ ।
पोखरा र खेलकुद : अवार्डसँगको सम्बन्ध
पल्सर स्पोर्ट्स अवार्डले वर्षेनी उत्कृष्ट खेलाडी, प्रशिक्षक, उदीयमान प्रतिभा र खेलकुदमा योगदान पु¥याउने व्यक्तित्वलाई सम्मान गर्दै आएको छ । यस अवार्डको प्रभाव पोखरामा झनै गहिरो देखिन्छ, किनभने यहाँ एथलेटिक्स, फुटबल, ह्याण्डबल, टेनिस, भलिबल, तेक्वान्दो, कराँतेदेखि दर्जनौ साहसिक खेलसम्मका प्रतिभा निरन्तर उत्पादन भइरहेका छन् ।
२१औं संस्करणसम्म आइपुग्दा, यो अवार्ड केवल काठमाडौंकेन्द्रित थियो । २२औं संस्करणमा यसले राजधानीको घेरा नाघ्दै पोखरा आइपुगेको छ । गत भदौमा तय भएको कार्यक्रम विभिन्न कारणले पौष २३ गते हुँदैछ । यो कार्यक्रम कार्यक्रमका लागि मात्रै नभई देशभरिका खेलाडीको साझा मञ्चका रूपमा स्थापित छ । पोखराका खेलाडीहरूले विगतका संस्करणहरूमा विभिन्न विधामा उत्कृष्टता प्रदर्शन गर्दै अवार्ड जितेर, मनोनयनमा परेर वा अन्तिम सूचीमा रहेर सहरको खेलकुद पहिचानलाई राष्ट्रिय स्तरमा अझ बलियो बनाएको इतिहास हाम्रो सामु छ ।
हुन त नेपाल खेलकुद पत्रकार मञ्च गण्डकीले हरेक वर्ष गण्डकी प्रदेशस्तरीय स्पोर्ट्स अवार्ड आयोजना गर्दै आइरहेको छ । यसले पनि प्रदेशका खेलाडीहरुलाई उर्जा दिने काम गरेको छ ।
प्रेरणा र पहिचानको माध्यम
खेलकुदमा संघर्ष, अनुशासन र निरन्तरताको मूल्य उच्च हुन्छ । पल्सर स्पोर्ट्स अवार्डले ती मूल्यलाई सार्वजनिक रूपमा सम्मानित गरेर युवा पुस्तालाई प्रेरित गरिरहेको छ । पोखराका विद्यालय, कलेज र खेल सघमा अभ्यासरत खेलाडीहरूका लागि यो अवार्ड “एक दिन म पनि” भन्ने सपना देख्ने आधार बन्ने छ ।
विशेषगरी सीमित स्रोतसाधनका बीच संघर्ष गरिरहेका पोखरेली वा अन्य जिल्लाका खेलाडीहरुका लागि राष्ट्रिय मञ्चमा नाम उच्चारण हुनु नै ठूलो उपलब्धि हो । यसले उनीहरूलाई आत्मविश्वास दिनुका साथै स्थानीय सरकार, संघसंस्था र प्रायोजकलाई खेलकुदमा लगानी गर्न प्रेरित गर्नेछ । पल्सर स्पोर्ट्स अवार्डको सबैभन्दा ठूलो योगदान भनेको प्रेरणा हो । युवा खेलाडीका लागि यो अवार्ड सपना र लक्ष्यको प्रतीक बनेको छ । अवार्ड जित्ने खेलाडीको संघर्षको कथा, उनीहरूले भोगेको कठिन यात्रा र अन्ततः प्राप्त सम्मानले नयाँ पुस्तालाई खेलकुदलाई करिअरका रूपमा रोज्न आत्मविश्वास प्रदान गर्छ ।
खेलकुद अर्थतन्त्र र पोखरा
पोखरा पर्यटन सहर हो । खेलकुद र पर्यटनको सहकार्यले सहरको अर्थतन्त्रमा नयाँ सम्भावना सिर्जना गर्न सक्छ । पल्सर स्पोर्ट्स अवार्डजस्ता राष्ट्रियस्तरका कार्यक्रमले खेलकुदलाई मनोरञ्जन उद्योगसँग जोड्दै रहेको नेपाली खेलकुदमा व्यवसायिकताका अझै बल मिल्ने छ । यसले खेलाडी मात्र होइन, प्रशिक्षक, व्यवस्थापक, खेल पत्रकार र आयोजकहरूलाई पनि अवसर प्रदान गर्नेछ ।
यदि भविष्यमा यस्ता अवार्ड जस्ता ठूला खेलकुद कार्यक्रम पोखरामै आयोजना हुन सके, त्यसले पर्यटन, यातायात, सञ्चार र सेवा क्षेत्रलाई प्रत्यक्ष फाइदा पुर्याउने छ भन्ने विषयलाई विगतमा आयोजना भएको १३औं साग र नवौं राष्ट्रिय खेलकुद प्रतियोगिताले समेत पुष्टि गरिसकेका छन् ।
निष्कर्ष
२२औं पल्सर स्पोर्ट्स अवार्ड केवल एक सम्मान समारोह मात्र होइन, यो नेपाली खेलकुदको दिशा, मूल्य र सम्भावनाको प्रतिबिम्ब हो । पोखरेली खेलकुदका लागि यसले दिएको सन्देश स्पष्ट छ-प्रतिभा जहाँ भए पनि चिनिन्छ, मेहनतको कदर हुन्छ र खेलकुद भविष्यको सम्भावना समेत रहेको हुन्छ ।
अब आवश्यक छ, यस्ता राष्ट्रिय मञ्चलाई अवसरका रूपमा प्रयोग गर्दै पोखराले आफ्ना खेल प्रतिभालाई अझ व्यवस्थित, वैज्ञानिक र दिगो रूपमा अघि बढाउने रणनीति तयार गर्नु पर्छ ।
२२औं संस्करणले स्थानीय तह, प्रदेश सरकार र निजी क्षेत्रलाई पनि सन्देश दिनेमा कुनै शंका छैन । खेलकुदमा गरिएको लगानी दीर्घकालीन रूपमा समाज र अर्थतन्त्रका लागि लाभदायक हुनेसँगै पोखरामा खेल पूर्वाधार, वैज्ञानिक प्रशिक्षण प्रणाली र नियमित प्रतियोगिताको व्यवस्था गर्न यहाँका खेलाडी अन्तर्राष्ट्रियस्तरमा अझ प्रभावकारी रूपमा प्रतिस्पर्धा गर्न सक्षम हुनेछन् ।
अर्कोतर्फ, पल्सर स्पोर्ट्स अवार्डले खेलकुदमा पारदर्शिता, निष्पक्षता र प्रदर्शन–आधारित मूल्यांकनको संस्कार विकास गर्न पनि योगदान दिने छ । उत्कृष्ट प्रदर्शन नै सम्मानको मुख्य आधार बन्नुले खेलाडीहरूलाई अनुशासित र लक्ष्यकेन्द्रित बन्न प्रेरित गर्ने छ । यो संस्कार पोखरेली खेलकुदका लागि पनि उत्तिकै महत्वपूर्ण छ ।
२२औं पल्सर स्पोर्ट्स अवार्ड नेपाली खेलकुदको उत्सव मात्र होइन, यो सम्भावना, प्रेरणा र भविष्यको संकेत हो । पोखरेली खेलकुदका लागि यसको सन्देश स्पष्ट छ । प्रतिभा स्थानीय हुन सक्छ, तर पहिचान राष्ट्रिय र अन्तर्राष्ट्रिय स्तरमा सम्भव छ । अब आवश्यक छ, यस अवार्डले देखाउने मार्गदर्शनलाई अवसरका रूपमा उपयोग गर्दै पोखराले आफ्ना खेल प्रतिभालाई अझ व्यवस्थित, दिगो र व्यावसायिक रूपमा अघि बढाउनु पर्छ । यहि पुष २३ गते आयोजना हुने पल्सर स्पोेर्ट्स अवार्डले देखाएको बाटोमा हिँड्न सके पोखरेली खेलकुदको भविष्य झनै उज्यालो हुनेमा कुनै शंका छैन ।
