पोखरा स्पोर्टस । आईटीएफ वर्ल्ड जुनियर यु–१४ टेनिस प्रतियोगिताअन्तर्गत प्रि–क्वालिफाइङका लागि नेपालबाट पोखराका दर्शिल श्रेष्ठसहित ३ पुरुष खेलाडी छनोट भएका छन् ।
बोरिस अधिकारी, दर्शिल श्रेष्ठ र वृजेश अर्याल छनोट भएको नेपाल टेनिस संघका कार्यालय सचिव प्रवीण देवकोटाले जनाएका छन् । प्रशिक्षकमा सूर्यभूषण वज्राचार्य रहेका छन् । प्रतियोगिता फेब्रुअरी १३ देखि १८ तारिखसम्म श्रीलंकाको कोलोम्बोमा हुनेछ ।
त्यस्तै संघ मलेसियाको कुचिङमा मार्च २० देखि २५ तारिखसम्म हुने आईटीएफ यु–१४ फाइनल क्वालिफाइङका लागि छनोट प्रतियोगिता गर्ने भएको छ ।
छनोट प्रतियोगिता फेब्रुअरी १२ तारिखमा सातदोबाटोस्थित टेनिस कम्प्लेक्समा हुनेछ । ३ महिला खेलाडी उक्त प्रतियोगिताका लागि छनोट गरिने कार्यालय सचिव देवकोटाले जानकारी गराए ।
