पोखरा स्पोर्ट्स । दक्षिण अफ्रिकाले आइसीसी टी-२० विश्वकप २०२६ खेल्ने टिमको घोषणा गरेको छ । दक्षिण अफ्रिकी क्रिकेट बोर्डले एडेन मार्क्रमको कप्तानीमा १५ सदस्यीय टिमको घोषणा गरेको हो ।
टिममा कोर्बिन बोश, डेवाल्ड ब्रुइस, टोनी डे जियोर्गी, डोनोभान फरेरा, जर्ज लिन्डे, क्वेना म्फाका र जेसन स्मिथ समावेश छन्, जसलाई पहिलो पटक टी-२० विश्वकपका लागि छनोट गरिएको छ । करङको चोटका कारण भारतीय भ्रमण गुमाएपछि तीव्र गतिका बलर कागिसो रबाडा टी-२० अन्तर्राष्ट्रिय टोलीमा फर्किएका छन् ।
दक्षिण अफ्रिकी टिममा एडन मार्क्रम (कप्तान), कोर्बिन बोश, डेवाल्ड ब्रुइस, क्विन्टन डे कक, टोनी डे जियोर्गी, डोनोभान फेरेरा, मार्को जानसेन, जर्ज लिन्डे, केशव महाराज, क्वेना म्फाका, डेभिड मिलर, लुंगी एनगिडी, एनरिच नोर्टजा, कागिसो रबाडा र जेसन स्मिथ रहेका छन् ।
दक्षिण अफ्रिकाले फेब्रुअरी ९ मा अहमदाबादमा क्यानडाविरुद्ध आफ्नो विश्वकपको अभियान सुरु गर्दैछ ।
आइसीसी पुरुष टी–२० विश्वकप फेब्रुअरी ७ देखि सुरु हुँदैछ । प्रतियोगितामा नेपालसहित कुल २० देशले सहभागिता जनाउँदैछन् ।
समूह ‘ए’ मा आयोजक राष्ट्र भारत, पाकिस्तान, संयुक्त राज्य अमेरिका, नेदरल्यान्ड्स र नामिबिया छन्। त्यस्तै समूह ‘बी’ मा आयोजक राष्ट्र श्रीलंका, अस्ट्रेलिया, आइरल्यान्ड, जिम्बाब्वे र ओमान रहेका छन् । टी–२० विश्वकप खेल्ने समूह ‘सी’ मा नेपाल, वेस्ट इन्डिज, बंगलादेश, इटाली र इंग्ल्यान्ड रहेका छन् । समूह ‘डी’ मा भने न्युजिल्यान्ड, दक्षिण अफ्रिका, अफगानिस्तान, क्यानडा र युएई रहेका छन् ।
