पोखरा स्पोर्ट्स । पालिखेचोकस्थित प्रतिभा माविले विभिन्न खेलकुद गतिविधिमा उत्कृष्ट विद्यार्थीलाई सोमबार एक कार्यक्रमबीच पुरस्कार वितरण गरेको छ । वार्षिक खेलकुद कार्यक्रमअन्तर्गत वर्षभरि भएका खेलकुदका विभिन्न गतिविधिका उत्कृष्ट विद्यार्थी र समूहलाई पुरस्कार वितरण गरिएको हो ।
पोखरा रंगशालामा आयोजित कार्यक्रमको प्रमुख अतिथि पोखरा महानगरपालिका–३ का अध्यक्ष प्रकाशमान उदास, विद्यालय संचालक समितिका अध्यक्ष नारायण पौडेल लगायतले उद्घाटन गरेका थिए ।
प्रतिभाले विद्यालय तहमा आन्तरिक प्रतिस्पर्धा हुनेगरि फुटसल, भलिवल, बास्केटबल, टेवलटेनिस, चेस लगायतका खेलकुद गतिविधि संचालन गरेको थियो । तिनै खेलकुदका उत्कृष्ट विद्यार्थी र टिमलाई पुरस्कार वितरण गरिएको हो ।
विद्यालयका प्राचार्य किरण सापकोटाका अनुसार विद्यालय तथा ११ र १२ कक्षाका विद्यार्थीका लागि केही समय अघि विद्यालयभित्र खेलकुदका विभिन्न कार्यक्रम आयोजना गरिएको थियो । तिनै खेलकुद गतिविधिमा उत्कृष्ट भएका विद्यार्थी र खेलाडी समूहलाई सोमबार सामूहिक रुपमा पुरस्कार वितरण गरिएको थियो ।
‘विद्यालय तहका सबै कक्षालाई खेलकुदमा समेट्नेगरि खेलकुदका गतिविधि गरिएको थियो । तिनै खेलका उत्कृष्ट विद्यार्थीलाई सोमबार मेडल तथा प्रमाणपत्र प्रदान गरिएको हो,’ प्राचार्य सापकोटाले भने । विद्यार्थीमा किताबी ज्ञान बाहेक खेलकुदका गतिविधिभित्रको सक्रियता पनि आवश्यक रहेको उनले बताए ।
‘विद्यार्थीको शारिरीक तथा मानसिक विकासका लागि खेलकुदका गतिविधि आवश्यक पर्छ । विद्यालयमा पढाईका अतिरिक्त खेल गतिविधि पनि चाहिन्छ,’ उनले भने, ‘जब विद्यार्थी खेलमा सक्रिय हुन्छ, उसको शारिरीक तथा मानसिक विकास हुन्छ ।’
प्राचार्य सापकोटाले खेलकुदका गतिविधिले विद्यार्थीमा नेतृत्व, सहकार्य, मेलमिलाप जस्तो जिवनोपयोगी सिपको विकास हुने बताए । ‘खेलसँग जोडिँदा त्यसको महत्व राष्ट्रसम्म पनि जोडिन्छ । त्यसैले विद्यार्थीलाई खेल गतिविधिमा सहभागिताको आवश्यक पर्छ,’ उनले भने ।
प्रमुख अतिथि पोखरा–३ का अध्यक्ष प्रकाशमान उदासले खेल गतिविधिले विद्यार्थीमा लुकेको क्षमता बाहिर ल्याउन सकिने बताए । ‘जो कोही खेलाडी विद्यालयबाटै प्रस्फुटन हुने हो । विद्यालय तहमा खेल्दै खेलकुदमा अघि सरेको खण्डमा बल्ल खेलाडीले पहिचान कमाउन सक्छ,’ उनले भने, ‘विद्यार्थीमा पाठ्यपुस्तकको ज्ञान मात्र नभई खेलकुदका गतिविधि पनि आवश्यक पर्छ । यसले विद्यार्थीलाई अतिरिक्त क्रियाकलापमा सहभागि बनाउँछ ।’
विद्यालय संचालक समितिका अध्यक्ष नारायण पौडेलले विद्यार्थीलाई खेलमा सहभागि गराउँदा उनीहरुमा अनुशासन समेत बढाउन सकिने बताए । ‘खेलकुदमा अनुशासनको महत्व हुन्छ । त्यो महत्व विद्यार्थीले खेल दौरान विद्यालयबाटै सिक्न पाउँछन,’ उनले भने, ‘पाठ्यपुस्तकले सबैतिर समेट्न नसकेको बेला विद्यार्थीलाई खेलकुदमा सहभागि गराउन सक्ने हो भने त्यसले विद्यार्थीको व्यक्तिगत दक्षताको पनि विकास गराउँछ ।’ खेलकुदम सक्रिय विद्यार्थी शारिरीक रुपले पनि स्वस्थ बन्ने भएकोले खेलको महत्व रहेको उनले बताए ।
विद्यालयका प्राचार्य सापकोटाका अनुसार सोमबार खेलकुदका सहभागि र विजेता खेलाडीलार पुरस्कार वितरणसँगै फुटबल र एथलेटिक्सका खेल पनि रंगशालामै आयोजना गरिएको थियो ।
