पोखरा स्पोर्टस । गोरखामा सम्पन्न १५ औं गण्डकी प्रदेशस्तरीय राष्ट्रपति रनिङ शिल्ड कास्कीले उचालेको छ ।
पहिलो पटक गोरखामा आयोजित उक्त प्रतियोगितामा कास्कीले २७ स्वर्ण, १० रजत र ११ काश्य पदकका साथ उपाधि जितेको हो । यो सहित कास्कीले तेस्रो पटक उपाधि जित्दै रनिङ शिल्ड माथि नै कव्जा जमाएको छ ।
१६औं राष्ट्रपति रनिङ शिल्ड बाग्लुङमा हुने
यसै बीच १६ औं राष्ट्रपति रनिङ शिल्ड बाग्लुङमा हुने भएको छ । १५ औं राष्ट्रपति रनिङ शिल्ड समापन भए लगतै बाग्लुङलाई झण्डा हस्तान्तरण गरिएको सदस्य सचिब श्रीधर शर्माले पोखरा स्पोर्टसलाई बताए । उनले भने–“यस अघि गोरखाले झण्डा ग्रहण गरेको थियो । गोरखाले आफ्नो कार्य सफलता पूर्वक सम्पन्न गरेको छ । अब पालो बाग्लुङको हो ।”हरेक वर्ष आयोजना हुने राष्ट्रपति रनिङ शिल्डले त्यस जिल्लाको खेलकुदमा नयाँ माहोल तयार हुनुका साथै खेलकुदका पूर्वाद्धार निर्माण तथा मर्मतमा समेत भूमिका रहने सदस्य सचिब शर्माले जनाए । उनले भने–“त्यहाँ खेलकुदको ए नयाँ उभार आउने छ । सामाजिक क्षेत्रमा संगै प्रशासनिक एवं विद्यालयहरुमा समेत यसको प्रभाव रहन्छ । साथै त्यहाँका खेल पूर्वाद्धारहरुको अवस्थाका बारेमा समेत सबैले बुझ्ने र कसरी राम्रो गर्न सकिन्छ भन्ने ध्यान जान्छ ।”
कास्कीले एथलेटिक्सतर्फ सर्वाधिक ११ स्वर्ण पदक जितेको छ भने तेक्वान्दोतर्फ ९, उशुमा ५ तथा कब्बड्डी र करातेमा १–१ स्वर्ण पदक जितेको कास्की जिल्ला खेलकुद विकास समितिका अध्यक्ष मिलन गुरूङले जानकारी दिए ।
त्यसै गरी म्याग्दी जिल्ला उपविजेता बनेको छ । म्याग्दी ११ स्वर्ण, ७ रजत र ९ काश्य पदक जित्दा तेस्रो स्थान प्राप्त गरेको बाग्लुङले १० स्वर्ण, १० रजत र १० काश्य पदक जित्न सफल भएको प्रदेश खेलकुद परिषद गण्डकीका सदस्य सचिब श्रीधर शर्माले पोखरा स्पोर्टसलाई जानकारी दिएका छन् ।
प्रतियोगितामा आयोजक गोरखा भने चौथो भएको छ । प्रतियोगितामा ६ खेलमा १० जिल्लाका ९३८ खेलाडी, प्रशिक्षक र व्यवस्थापकहरुको सहभागिता रहेको थियो । प्रतियोगितामा मुस्ताङ जिल्लाले सहभागिता जनाएन । मुस्ताङ जिल्लामा कर्मचारी अभावका कारण छनौट खेल हुन नसक्दा सहभागिता हुन नसकेको जनाइएको छ ।
सो प्रदेशस्तरीय प्रतियोगिताबाट विभिन्न ६ खेलका ४७ छात्र र ४७ छात्रा गरी ९४ जना खेलाडीहरुले भोली (बुधबार)बाट हुने केन्द्रिय राष्ट्रपति रनिङ शिल्डमा सहभागिता जनाउने भएको परिषदका कार्यालय प्रमुख तोपलाल भुसालले जानकारी दिए । खेलाडी, प्रशिक्षक र टिम व्यवस्थापक गरी गण्डकीबाट ११५ जना काठमाण्डौ प्रस्थान गरेको परिषदले जनाएको छ ।
