पोखरा स्पोर्टस । पोखरामा हुने हिमालयन एक्सट्रिम ट्रायथलनको सम्पूर्ण तयारी पुरा भएको छ ।
पोखरामा हरेक वर्ष आयोजना हुँदै आएको विश्वकै कठिन मानिने हिमालयन एक्स्ट्राई वर्ल्ड टुर एक्सट्रिम ट्रायथलन भोली शनिबार हुने भएको हो । चौथो संस्करणको उक्त ट्रायथलनमा १९ देशका २५ पुरूष र ७ महिला गरी ३२ जनाले प्रतिस्पर्धा गर्ने रेस डाइरेक्टर रिकेश योञ्जनले जानकारी दिएका छन् ।
कहाँ र कसरी हुन्छ रेस
विश्वकै कठिन प्रतियोगिताको मध्येको एक उक्त प्रतियोगिता अन्तर्गत फेवातालमा ३.८ किमि पौडी, १ सय ६५ किमि साइक्लिङ र ४३ किमि दौड समावेश रहेको छ ।फेवातालमा पौडी बाट सुरु भए लगतै १७५ किमि साइकल दौड सुरु हुनेछ । सो पौडी विहान ४ बजे हुनेछ । पोखरा लेकसाईडबाट सुरु हुने साइकल दौड सराङकोट–पर्वतको कुस्मा–गलुङकालिका हुँदै पुनः फर्किएर कास्कीको लुम्ले काँडेमा पुगेर सम्पन्न हुनेछ । सो लगतै ४३ किमि लामो दौड सुरु हुनेछ । उक्त दौड काँडे हुँदै ४ हजार मिटरमा रहेको मर्दी हिमाल भ्यू पोइन्टलाई छुँदै पुनः फर्किएर माछापुच्छ्रे गाउँ पालिकाको ल्वाङमा पुगेर सम्पन्न हुनेछ ।
सन २०२७ मा नेपालमा नै वर्ल्ड एक्सट्रिम ट्रायथलनको आयोजनाको तयारी समेत सुरू गरेको हिमालयन एक्सट्रीले चौथो सस्करणमा नेपाल आउने खेलाडीहरुले निकै चासो देखाएको रेस डाइरेक्टर योञ्जनले बताए । उनले भने–“यो वर्ष पोखरा पयर्टन भ्रमण वर्ष समेत रहेकोले हामी विश्वका सबै खेलाडीहरुलाई यहाँ आउन विभिन्न माध्यमबाट निम्तो समेत दिएका थियौं जसका कारण ७ महिलाले यो पटक प्रतिस्पर्धा गर्दैछन् । यदि उनीहरुले रेस पुरा गरे यो ऐतिहासिक समेत हुनेछ । यसले खेलकुदको माध्यमबाट विश्वमा पोखरालाई अझै प्रवर्द्धन गर्न यो अवसरले महत्व राख्नेछ ।”
उनका अनुसार उनीहरूआफूलाई यहाँको वातावरणमा तयार गर्न प्रतियोगिता सुरू हुनु भन्दा १० दिन अघि नै पोखरा आउनेछन् । उनीहरुको नेपाल बसाई दुई साता भन्दा लामो हुने उनले बताए ।
यो वर्ष खेलाडीहरुको संख्या ३२ जना रहे पनि उनीहरु संग आउने प्रशिक्षक, पत्रकार, फोटोग्राफर गरी ९० जना भन्दा बढि विदेशी पोखरा आएका छन् । विश्वमा हुने कठिनतम रेस हरू मध्ये पोखरामा हुने यो रेस, विश्वकै कठिन रेसका रूपमा पहिचान रहेको बताउँदै योञ्जनले यो रेस विगत वर्षहरुको भनदा फरक हुने बताए ।
प्रतियोगितामा गत वर्ष सम्पन्न तेस्रो संस्करणका उपविजेता काजाकास्तानका रुस्लान एर्जानोभ समेतको सहभागिता रहेको छ ।
प्रतियोगितामा भारतसहित चेक रिपब्लिक, काजाकास्तान, जर्मनी, फ्रान्स, अमेरिका, रसिया, इन्डोनेशिया, यूक्रेन, ताइवान, नर्वेलगायत मुलुकका खेलाडीहरुको सहभागिता हुनेछ । प्रतियोगिता सम्पन्न गर्न करिव १ करोड खर्च लाग्ने रेस डाइरेक्टर योन्जनले जनाएका छन् ।
प्रतियोगितालाई राष्ट्रिय खेलकुद परिषद, प्रदेश खेलकुद परिषद गण्डकी, पोखरा महानगर पालिका, नेपाल पर्यटन बोर्ड गण्डकी प्रदेश, सिभिक क्लिनिकलगायतको सहयोग रहेको छ ।
पोखरालाई खेलकुद मार्फत विश्वमा चिनाउन यो प्रतियोगिताले भूमिका खेल्ने बताउँदै रेस डाइरेक्टर योन्जनले प्रतियोगितालाई वातावरण मैत्री बनाउने प्रयास गरिएको बताए ।
फोटोः अंकित मानन्धर
