पोखरा स्पोर्टस । जिल्ला खेलकुद विकास समिति कास्कीले १४ महिनामा १४ लाख भन्दा बढि बचत भएको जनाएको छ ।
समितिले बिहिबार पोखरामा एक अन्तक्रिया कार्यक्रममा सो जानकारी दिएको हो । पत्रकार सम्मेलनमा दिइएको जानकारी अनुसार बचत तर्फ १४ लाख १६ हजार १९० बचत भएको जानकारी दिइयो । सो अवसरमा बोल्दै जिल्ला खेलकुद विकास समिति कास्कीका अध्यक्ष तोरण बहादुर बानियाँले २०८०/०८१ को आय व्यय र २०८१ मंसिर सम्मको गरी १४ महिनामा ५४ लाख ६८ हजार ७३५ आम्दानी र खर्चतर्फ ४० लाख ४५ हजार ३९६ खर्च भएको जनाएका हुन् ।
सो अवसरमा उनले पोखरा रंगशालाको मर्मत सम्भार र संरक्षणको विषय निकै चुनौतीपूर्ण रहेको जनाउँदै पोखरेलीहरुको गहनाको रुपमा रहेको पोखरा रंगशाला संरक्षणका लागि सबैको चासो हुनुपर्ने कुरामा जोड दिए । सो अवसरमा विभिन्न संघसंस्थाहरुलाई समेत सम्मान गरिएको थियो ।
खेलकुद विकासका लागी सहकार्य आवश्यक–मन्त्री थापा
गण्डकी प्रदेश सरकारका सामाजिक विकास, युवा तथा खेलकुद मन्त्री विन्दुकुमार थापाले खेलाडी, खेलसंस्था र सरकारबीच सहकार्य अपरिहार्य रहेको बताए । जिल्ला खेलकुद विकास समिति कास्कीद्वारा आयोजित वार्षिक आर्थिक प्रतिवेदन, समिक्षा एवम् अन्तरक्रिया कार्यक्रममा सहभागिता जनाउँदै उनले खेलकुद क्षेत्रको विकासका लागि प्रदेश सरकार प्रतिबद्ध रहेको स्पष्ट पारेका हुन् ।
मन्त्री थापाले खेलकुद पूर्वाधारको विस्तार, खेलाडीहरूको क्षमता अभिवृद्धि तथा खेल क्षेत्रको समग्र प्रवद्र्धनलाई सरकारको प्राथमिकतामा राखिएको बताउँदै खेलाडीहरूका हकहित संरक्षण तथा प्रतिस्पर्धात्मक क्षमताको अभिवृद्धिका लागि विभिन्न नीति तथा कार्यक्रमहरू सञ्चालन गरिएको जानकारी गराए ।
उनले खेलकुद केवल व्यक्तिगत उपलब्धिसँग सीमित नरही प्रदेशको समृद्धि, पर्यटन प्रवद्र्धन तथा अन्तर्राष्ट्रिय पहिचानका लागि पनि महत्वपूर्ण क्षेत्र भएकाले प्रदेश सरकारले लगानी बढाउने प्रतिबद्धता व्यक्त गरे । साथै, खेल क्षेत्रको दिगो विकासका लागि सरोकारवाला सबै पक्षको सहकार्य आवश्यक रहेको उल्लेख गर्दै स्थानीय तह, खेल संघ–संस्था, खेलाडी तथा खेलप्रेमीहरूसँग सहकार्य गरी नीति निर्माण तथा कार्यक्रम कार्यान्वयन गरिने भनाई उनको छ ।
पोखरा महानगरपालिकाका मेयर धनराज आचार्यले पोखरामा भएका हरेक प्रकारका खेलकुद सम्बन्धि कार्यक्रममा महानगरको साथ रहेको उल्लेख गरे । पोखरा पर्यटनको राजधानी भएकाले खेलकुद मार्फत पनि पर्यटन बढ्वामा टेवा पुुर्याउने हेतु गतिविधि बढाउन उनको आग्रह छ ।
उक्त कार्यक्रममा खेल क्षेत्रका विभिन्न संघसंस्थाका प्रतिनिधिहरू, खेलाडी, प्रशिक्षक, पत्रकार तथा सरोकारवालाहरूको उपस्थिति थियो । सहभागीहरूले खेल क्षेत्रमा देखिएका अवसर र चुनौतीबारे आफ्ना विचार राख्दै खेलाडीहरूको क्षमता अभिवृद्धि, पूर्वाधार विकास तथा खेल प्रशासनको सुदृढीकरणमा प्रदेश सरकारको थप ध्यानाकर्षण गराएका थिए ।
जिल्ला खेलकुद विकास समिति कास्कीका अध्यक्ष बानियाँको अध्यक्षतामा सम्पन्न कार्यक्रममा खेलकुद परिषद गण्डकीका उपाध्यक्ष धोजकुमार गुरुङ लगायतले बोलेका थिए ।
