पोखरा स्पोर्टस । आसन्न पोखरा अन्तर्राष्ट्रिय म्याराथनअन्तर्गत हुने गण्डकी प्रदेश बिजेतातर्फको पुरस्कार आयोजक संस्थाका पदाधिकारीहरुले दिने घोषणा गरेका छन् ।
नेपाली अग्रज खेलाडीहरुको छाता संस्था नेपाल भूतपूर्व खेलाडी मञ्चको आयोजनामा पोखरा अन्तर्राष्ट्रिय म्याराथन यहि फागुन ३ गते हुँदैछ । गण्डकी प्रदेशतर्फ पहिलो देखि आठौं सम्मका बिजेताको कुल पुरस्कार राशी १ लाख ४३ हजार रहेको मञ्चले जनाएको छ । प्रदेश बिजेतातर्फको पुरस्कार आयोजक संस्थाका पदाधिकारीहरुले दिने घोषणा गरेका हुन् ।
गण्डकी प्रदेशका खेलाडीहरूलाई खुल्ला म्याराथन (४२.१९५ किमि) दौडतर्फ आकषर्ण गर्न र उनीहरूको प्रतिभालाई राष्ट्रिय तथा अन्तर्राष्ट्रियस्तर सम्म उठाउन मञ्चका पूर्व अध्यक्षसहित पदाधिकारीहरूले पुरस्कार राशी घोषणा गरेको अध्यक्ष दिल बहादुर गुरूङले बताए । उनले भने–“हामी अन्तर्राष्ट्रिय प्रतियोगिता आयोजना गर्छाैं तर हाम्रो पहिलो प्राथमिकता स्थानिय खेलाडीहरूको आवाज बन्नु पर्छ भन्ने हो । हामी यहिंबाट उठेका हौं । हामी गण्डकीको खेलकुदको जग बलियो बनोस । नयाँ प्रतिभा जन्मियोस भन्ने चाहन्छौं ।”
मञ्चका अध्यक्ष गुरूङका अनुसार पहिलो पुरस्कार राशी नगद रु ५० हजार संस्थापक अध्यक्ष खड्ग बहादुर रानाभाटले प्रायोजन गर्नेछन् । उनले विगत ३ वर्ष देखि निरन्तर सो पुरस्कार राशी दिंदै आएको अध्यक्ष गुरूङले पोखरा स्पोर्टसलाई जानकारी दिए ।
त्यसै गरी दोस्रो पुरस्कार राशी नगद रु ३० हजार पूर्व अध्यक्ष प्रा.डा.विरेन्द्र सिंह गुरूङले, तेस्रो पुरस्कार नगद रु २० हजार पूर्व अध्यक्ष तेज बहादुर गुरूङले, चौथो पुरस्कार नगद रु १५ हजार निवर्तमान अध्यक्ष हरिप्रसाद पराजुलीले, पाचौ पुरस्कार राशी नगद रु १० हजार अध्यक्ष दिल बहादुर गुरूङले, छैटौं पुरस्कार नगद रु ८ हजार प्रथम उपाध्यक्ष खेम बहादुर गुरूङले, सातौं पुरस्कार राशी नगद रु ६ हजार द्वितिय उपाध्यक्ष कृष्ण तिमिल्सिना र आठौं पुरस्कार राशी नगद रु ४ हजार महासचिबले दिने भएका छन् ।
पोखरा म्याराथनलगायत साप्ताहिक तथा मासिक दौडको संयोजन गर्न पूर्व अध्यक्ष तेज बहादुर गुरूङलाई ‘रेस डाइरेक्टर’को रूपमा घोषणा गरिएको मञ्चले जनाएको छ । त्यसै गरी माघ १९ गते हुने मासिक दौड अन्तर्गतको दोस्रो संस्करणलाई सम्पन्न गर्न तयारी सुरू भएको जनाउँदै अध्यक्ष गुरूङले सबै विद्यालयहरूलाई सहभागिताका लागि आग्रह गरेका छन् । उक्त दौड पहिलो संस्करण जस्तै गरी पोखरा रंगशालाबाट सुरू हुनेछ ।
