पोखरा स्पोर्ट्स । नेपाल क्रिकेट संघ (क्यान) ले नेपाल प्रिमियर लिग (एनपीएल) मा ४७ करोड ३६ लाख रुपैयाँ आम्दानी गरेको छ ।
संघले सोमबार बसेको कार्यसमितिक बैठकपछि एनपीएलको आम्दानी सार्बजनिक गर्दै कुल आम्दानी ४७ करोड ३६ लाख रुपैयाँभन्दा बढी रहेको जानकारी दिदै प्रतियोगिता सञ्चालन खर्च करिब २१ करोड ९६ लाख रुपैयाँ रहेको उल्लेख गरेको छ ।
क्यानले राजस्व बाँडफाँटअघिको कुल आम्दानी करिब २५ करोड ३९ लाख रुपैयाँ देखाएको छ । यस्तै ८ फ्रेन्चाइज टोलीलाई ५० प्रतिशत आम्दानीअन्तर्गत १६ करोड १८ लाख रुपैयाँभन्दा बढी वितरण गरिएको र संघको हिस्सा करिब ९ करोड २१ लाख रुपैयाँ रहेको जानकारी दिएको छ ।
त्यस्तै बैठकले अन्तर्राष्ट्रिय क्रिकेट परिषद् (आईसीसी) को सहयोगमा प्राप्त हुने बजेटलाई महिला क्रिकेटको विकासमा केन्द्रित गर्ने निर्णय पनि गरेको जनाएको छ । महिला क्रिकेट प्रवर्द्धनका लागि वार्षिक रूपमा करिब ५ लाख अमेरिकी डलर बराबरको बजेट व्यवस्थापन गरिने संघले जनाएको छ ।
संघले वैशाख १७ र १८ गते वार्षिक साधारणसभा आयोजना गर्ने निर्णय गरेको छ । आर्थिक वर्ष २०८३/८४ का लागि वार्षिक कार्यक्रम तथा बजेट अनुमोदन गरेको छ ।
त्रिभुवन विश्वविद्यालय क्रिकेट मैदानको संरचना तथा व्यवस्थापन सम्बन्धमा पनि निर्णय लिँदै उक्त मैदानलाई अन्तर्राष्ट्रिय स्तरको सुविधा सम्पन्न बनाउने कार्यलाई प्राथमिकतामा राखिएको जनाएको छ । फ्लडलाइट जडानसहितको पूर्वाधार विकास कार्य अघि बढाइने र आवश्यक समन्वयका लागि सम्बन्धित निकायसँग पहल गरिने जनाइएको छ ।
त्यसैगरी जिल्ला क्रिकेट संघहरूको संरचनासम्बन्धी विषयमा पनि निर्णय गर्दै चार वर्षे कार्यकाल पूरा गरेका ३० जिल्लाका समितिको कार्यकाल असार मसान्तसम्म थप गर्ने निर्णय गरिएको छ ।
त्यस्तै क्यानले टियु क्रिकेट मैदानको सम्झौता नवीकरण गर्न, राखेप अन्तर्गत रहेको तल्लो मुलपानी क्रिकेट मैदान संघलाई हस्तान्तरण गर्न नेपाल सरकारलाई अनुरोध गर्ने निर्णय गरेको छ ।
