पोखरा स्पोर्टस । राष्ट्रिय खेलकुद परिषद (राखेप)को ११३ औ वोर्ड बैठक आइतबार काठमाण्डौमा सम्पन्न भएको छ ।
यूवा तथा खेलकुद मन्त्री महेश्वर जंग गहतराजको अध्यक्षतामा सम्पन्न बैठकले गण्डकी प्रदेशको राजधानी पोखरामा हुने नवौं राष्ट्रिय खेलकुद प्रतियोगिताका लागि बजेट संगै खेलाडीको भत्ता र पुरस्कारको समेत घोषणा गर्दै भदौ १५ सम्म खेलाडी संख्या र २५ गते सम्म नाम दर्ता गराई सक्नु पर्ने निर्णय गरेको हो ।
नवौं राष्ट्रिय खेलकुद प्रतियोगितामा प्रत्येक टिममा ३ सय ३९ जना महिला र ३ सय ६९ जना पुरुष खेलाडी सहभागि हुने कोटा समेत निर्धारण गरेको छ ।
बैठकको निर्णयको पूर्णपाठ
प्रेस विज्ञप्ती
पत्रकार बन्धुहरुराष्ट्रिय खेलकुद परिषदको ११३ औ बैठक माननीय युवा तथा खेलकुद मन्त्रीज्यूको अध्यक्षतामा आज मिति २०७९/०४/१५ गते बस्यो । बैठकमा परिषद्को आ.व. २०७९/०८० को बार्षिक योजना, कार्यक्रम तथा बजेट पारित गरियो ।
नवौं राष्ट्रिय खेलकुद २०७९ को सम्वन्धमा
-खेलाडी तथा अफीसियललाई दैनिक रु २००० भत्ता दिने ।-प्रदेश छनौटका लागि आवश्यक बजेट उपलव्ध गराउने ।
-सम्वन्धित जिल्ला तथा प्रदेशका खेलाडीहरुले मात्र सम्वन्धित टीममा सहभागि हुनु पर्ने ।
-प्रदेश तथा विभागिय टीमहरुले भदौ १५ गते सम्म खेलाडीको संख्या र २५ गते सम्म नाम दर्ता गराई सक्नु पर्ने ।
-प्रत्येक टिमबाट खेलाडी महिला ३३९ र पुरुष ३६९ कोटा निर्धारण गरियो ।
-३६ खेलमा प्रतिष्पर्धा हुने छ भने २ वटा खेलको प्रर्दशनी हुने ।
-खेल ईभेन्टस् ४०७ ।
-टीम ११ वटा हुने छन् ।
-प्रतियोगिताको एकल प्रतिष्पर्धामा स्वर्णपदक विजेत खेलाडीलाई नगद रु २५ हजार,टीम ईभेन्टमा स्वर्ण विजेतालार्ई रु १५ हजार तथा नयाँ राष्ट्रिय रेकर्ड राख्ने खेलाडीलाई रु ५० हजार उपलव्ध गराउने ।
-प्रतियोगिताको मूल ट्रफी प्रधानमन्त्रीज्यूबाट सार्वजनिक गरिने तथा ट्रफीलाई सातै प्रदेश तथा तीन विभागिय टोलीको मुख्यालयमा प्रर्दशन गरिने ।
– परिषदको कर्मचारी सेवा,शर्त सम्वन्धी विनियम तयार गर्न परिषद सदस्य प्रकाश कुसारीको संयोजकत्मा समिति गठन ।
– परिषदको भौतिक संरचना तथा सम्पती यकिन तथा प्रदेशमा हस्तान्तरण सम्वन्धी परिषद सदस्य अन्जन धमलाको संयोजकत्वमा समिति गठन ।
– खेल संघ विवाद सहजिकरणमा उपाध्यक्ष शिव कोईरालाको संयोजकत्वमा समिति गठन ।
– परिषद अन्तर्गत कार्यरत कर्मचारीहरुलाई अर्को व्यवस्था नभए सम्मका लागि कामकाज गर्न प्रदेश खेलकुद संरचनामा पठाईने ।
-२०२३ मा हुने चौधौं साग, २०२३ मा हुने १९ औ एशियाली खेलकुद,२०२४ मा पेरिस ओलम्पिक, २०२६ मा शितकालिन ओलम्पिक र -२०२६ को डकार युथ ओलम्पिक गेम्सका तयारीका लागि बजेट व्यवस्था तथा तयारी गर्ने ।
-ओ एन्ड एम सर्भे समिति गठन ।
-खेलाडी छात्रवास निर्माण ।
-मूलपानीमा एनएससी फिट्नेस सेन्टरको स्थापना गर्ने ।
