पोखरा स्पोर्टस । पोखरामा जारी १९ औं सस्करणको आहा ! रारा गोल्डकप उपाधि नजिक पुगेको संकटा व्याइज क्लब काठमाडौले शुक्रबार पोखरामा विच फुटबलको अनुभव बटुलेको छ ।
पोखरा २५ हेमजामा निर्माणको करिव संघारमा पुगेको विच फुटबल मैदानमा संकटाले स्थानिय टिम ‘द अम्वोट’ संग मैत्रीपूर्ण फुटबल खेलको अनुभव संगालेको हो । आहा रारा गोल्डकपमा उपाधिका लागि अफ्रिकन रुट्स संग भेट पक्का गरेको संकटाले भोली शनिबार हुने खेलको तयारीका लागि पनि विच फुटबल खेलेको प्रशिक्षक सल्यान खड्गीले बताए । उनले भने–“खेलाडीलाई रिफ्रेस्मेन्ट दिन र शनिवारका लागि थप जोश भर्न पनि हामीले खेलाडीलाई विच फुटबल मैदानमा उतारेका हौं ।
नेपालको विच फुटबल खेलको इतिहासमा पहिलो पटक निर्माण सम्पन्न हुन लागेको विच फुटबल कोर्टमा उत्रिने इतिहास समेत रचेको संकटाले विच फुटबल निकै मनोरञ्जनपूर्ण र फिटनेसका लागि समेत महत्वपूर्ण हुने क्लवका टिम म्यानेजर राजेश तुलाधरले बताए । उनले भने–“हाम्रो टिमका लागि यो निकै नौले अनुभव हो । हामी पोखरा आएर आहाको फाइनलमा पुगे संगै विच फुटबल समेत खेल्न पाइन्छ भन्ने कुरा कल्पना समेत गरेका थिएनौ ।”
आगामी नयाँ वर्ष २०७८ वैशाख १ गते संगै सबैका लागि खुला गर्न लागिएको विच फुटबल पिचको निर्माणको अन्य कामहरु भने बैशाखको तेश्रो हप्ता सम्म सकिने निर्माण समितीका सदस्य मध्येका एक रमेश कार्कीले पोखरा स्पोर्टसलाई बताए । प्रायः समुद्री किनारमा निर्माण हुने विच फुटबल पिच नेपालमा भने विशेष प्रकारको वालुवाको प्रयोग गरी निर्माण गरिएको छ । करिव १ करोड २० लाखको लागतमा निर्माण सम्पन्न हुन लागेको विच फूटबल पिचले पोखराको खेलकूदमा थप नयाँ गन्तव्यको रुपमा पहिचान बनाउन सफल हुने निर्माण कम्पनीले जनाएको छ ।
Aha Rara Advt
