केशब पाठक,
पोखरा, ५ भदौ ।
तेक्वान्दो पुम्से तर्फको खेल विद्यालाई प्रदेशमा माथी उठाउन नेपाल तेक्वान्दो संघ गण्डकी प्रदेशको आयोजनामा चार दिने पदेश स्तरिय प्रशिक्षण कार्यक्रम मंगलबार पोखरामा सम्पन्न भएको छ ।
उक्त प्रशिक्षण कार्यक्रममा नवलपुरका ४ जना, पर्वतका १ जना, म्याग्दीका ३ जना, बागलुङ्गका ४ र कास्कीका २२ जना गरि ३३ जनाको सहभागिता रहेको थियो । प्रशिक्षणमा दोश्रो डान देखि छैटौं डान सम्मका २९ जना पुरुष र ४ जना महिला खेलाडीहरुले प्रशिक्षण लिएको नेपाल तेक्वान्दो संघ गण्डकी प्रदेशका महासचिब रमेश पौडेलले जानकारी दिए ।
यहि भदौ २ गते देखि ५ गते सम्म संचालन भएको प्रशिक्षणमा तेक्वान्दोका प्रशिक्षक, डोजाङ प्रमुख र सिनियर खेलाडीहरुले सहभागिता जनाएको महासचिब पौडेलले बताए । सहभागीहरुलाई कोरियन प्रशिक्षक क्वाङ योंग दालले प्रशिक्षण दिएका थिए ।
समापन कार्यक्रममा प्रशिक्षार्थीहरुलाई प्रमाणपत्र प्रदान वितरण गर्दै गण्डकी प्रदेश सांसद मान बहादुर गुरुङले खेलाडीहरुको शिप, क्षमता र अनुभवलाई राज्यले संधै कदर गर्नु पर्ने धारणा राखे । उनले प्रदेशको खेल स्तर संगै खेलाडीहरुको जिवनस्तर माथी उठाउन गम्भिर भएर लागेको समेत बताउँदै भने–“अब खेलाडीले पाएको पदक र प्रमाणपत्र दराजमा थन्काएर खाडी मुलुक जाने दिनको अन्त्य गर्न तर्फ लाग्ने छौ ।”
कार्यक्रममा कास्की जिल्ला खेलकुद बिकास समितीका अध्यक्ष याम गुरुङले कास्कीमा झोले संघहरुले खेलकुदलाई बदनाम मात्रै गराएको तर चलाएमान खेलकुद संस्थाहरुलाई केही गर्न नसकिएको बताउँदै भने–“पोखरा रंगशालामा मार्शल आटर््स खेलका छुट्टाइएको ठाउँमा पूर्वाधार बनाउने छौ ।”
नेपाल तेक्वान्दो संघ गण्डकी प्रदेशका अध्यक्ष जगन गुरुङको अध्यक्षतामा भएको कार्यक्रममा पुम्सेका केन्द्रिय संयोजक कबिराज खडगी, नेपाल खेलकुद पत्रकार मंचका अध्यक्ष केशब पाठक लगाएतले आ–आफ्ना भनाई राखेका थिए ।
